阿莊認為，今次跌市由外圍因素引起，故必須待外圍市況企穩回暖，才有望真正扭轉弱勢。如今身處反彈市，並非搏命時候，小注跟勢炒個股則尚可。

呢期人心虛怯，市場對消息反應特別敏感。好似上月底有發改委官員發表「個人言論」，指「三年內免談房產稅」，內房股即彈，誰知話咁快被發改委否認，內房股又復弱勢，上車博反彈者被「落閘放狗」冇仇報，所以面對市場傳言，小注跟炒捉到路固然好，但到底仲係唔好太貪心，見好要識收，免被套牢。

新股風電設備生產商新疆金風科技（02208）昨天在港開始IPO前路演，據講集資額介乎78億至90億元，計劃本月二十二日掛牌，保薦人有三家投行，包括中金。

估值吸引大行唱好

咁啱上周高盛發表研究報告，指中傳動（00658）可受惠內地風電業嘅快速發展，並指其估值吸引，將其納入確信買入名單，目標價22元。

中傳動昨日收報18.24元，去年公司撇除可換股債券之公平值變動與股份掉期之收益及有關交易成本影響後，經調整純利為11億元人民幣，按年增長1.29倍。以此計算，現價往績市盈率18.6倍，其中風電相關產品佔總收益嘅67%，可見其確為風電業蓬勃發展嘅受益者。

睇過去被高盛納入其「確信買入」名單中嘅股份，十居其九都會有運行。再睇新股金風，曾喺內地股壇叱咤一時，若然定價保守啲，市況又配合嘅話，確實係一隻值得留意嘅新股。中傳動既屬影子股，可順勢而為。作為參考，向上去年中以來橫行區阻力位喺21元，近月支持位喺16元。