佛誕假期令港股避過一跌，但不明朗因素仲係唔少，限制港股升幅，尤其尋日發改委澄清市場傳「三年內免談開徵房產稅」並非官方立場，短期博反彈，仲係揀基本因素理想，早前基金洗倉洗過龍的優質股為先，始終有較佳的增長概念，基金一旦重新入市，這類股票必定最先受惠。
專為手機及電子產品生產高技術含量微型揚聲器的瑞聲（02018），同唔少基金愛股一樣，過去三個星期慘遭洗倉，股價由13元水平直插最低見9.05元，跌得快反彈亦快，尋日一升就一成一，反彈1.09元見10.58元。
瑞聲被大孖沙垂青，主要是行內競爭對手唔多，其客戶全是鼎鼎大名的國際企業，如諾基亞、蘋果公司及黑莓生產商RIM等。此外，超薄LED電視近年大行其道，管理層正準備開拓相關市場，今、明兩年業績可逐步浮現相關因素。睇番瑞聲早前出的季度業績，表現對辦，純利1.7億元人民幣，勁升1.26倍，一○年估值十二倍左右，龍頭工業股中股價吸引，只要市況穩定，中線重返13元左右機會唔細。
瑞聲聲學（02018）目標價：13.0元 止蝕價：9.6元