中美經濟峰會會期只有兩日，由於近月歐元變化甚大，故會議焦點不再係人民幣匯率，取而代之係喺其他範疇嘅合作，就如應對歐洲債務危機、共拓新能源等。講開新能源，內地致力拓展低碳經濟嘅策略，不會受到股市波動所動搖，若非大跌市，呢類國策股估值高得難以落手，如今最緊要係揸住現金，耐心等執平貨。

德國平治房車製造商Daimler繼年初宣布與比亞迪（01211）合作發展電池及動力傳動系統後，上月表示擬夥拍比亞迪於三年後喺內地推電動車產品，反映比亞迪喺拓展內地新能源汽車市場嘅領導地位獲海外同業認同。外電亦報道，嚟緊比亞迪會喺加州設立北美地區總部，準備今年下半年及明年上半年分別進軍美國及歐洲電動車市場。

靜候補貼政策出台

最近，比亞迪喺深圳推出E6電動出租車，聽聞用家反應良好。至於有關中央政府將針對新能源汽車消費出台補貼政策嘅消息流傳已久，但至今仍然係只聞樓梯響。

不過，鐵一般嘅事實係，新能源汽車量產初期，成本偏高，而配套設施發展又緩慢，若沒有政策支持，只怕事倍功半，所以單憑喺內地試推電動的士產品嘅消息，不足以刺激比亞迪嘅股價表現，反而有關新能源汽車銷售嘅補貼政策何時出台，先至係「戲肉」！

純睇股價走勢，近日該股反彈若未能重上60元，有機會下試55元承接，屆時可考慮分段入市收集。