雖然有傳鄭大班（鄭海泉）請假兩個月，但佢同滙控（00005）CEO等高層尋日一齊主持滙控AGM。太子傳媒老友問佢請假係唔係同健康有關，鄭大班就答得好巧妙，話「無請兩個月大假」，但係大假可以有好多種演繹。當老友再問佢會否出席下月初新中國總部開幕儀式，佢竟然話「到時睇吓點，到時話你知」。依家距離新中國總部開幕只係剩番兩個幾禮拜，鄭大班貴為滙豐中國董事長，點會仲未知會唔會出席？佢同集團主席葛霖嘅退休傳聞亦成為焦點之一，CEO紀勤回應指，葛霖暫無退休計劃，但坦言集團對主要職位有接任計劃。鄭大班都話未有退休計劃。