李寧（02331）透露首季同店銷售升5%，數字比一至二月春節期間的6.5%低，亦僅及早前公布營運數據的競爭對手安踏（02020）升10%嘅一半，消息一出，上周五股價跌0.85元，收報26.45元，是接近兩個月收市低位。美銀美林認為，失望的同店銷售及提供較預期大的折扣，只是暫時性，未來三季有趕上機會，達到該行10%的同店銷售增長預期。不過，高估值股票向來對低於預測的數字「寬容度」比較低，尤其近二十六倍市盈率唔算平。綜合市場預期，今年銷售額及純利分別有21%及19.8%增長，較佳的策略是等第二季數字出來至算，博反彈勝算唔高。

卓悅提防新股出籠

逆市奇葩卓悅（00653），今年以來股價累升1.73倍，單係過去一星期就急升47%，即使業績唔錯，去年增長20%，但超過二十九倍市盈率，估值已站在上市歷史高峰。講到底，卓悅大炒，同公司1送5紅股關係更大，翻查資源，卓悅舊有股本2.38億股，減咗大股東揸1.58億股，實際上街外流通8,000萬股甚至更低（考慮埋策略股東手上股份），基於1送5紅股本月廿七日至可交易，形成短期街外流通股份市值大減，睇番除淨後兩日，上周四和周五合共有7,640萬股轉手，幾乎所有街貨轉咗一次手，小心新股交易前會出現插水情況，現價絕對博唔過，等收新股的，筆者建議先沽掉一半套現。

最後不得不提平保（02318），私募基金新橋○九年透過出售深發展銀行股份換來的2.99億股平保，出乎意外地在上周五一次過減持超過一半，沽掉1.6億股套現近百億元，儘管以下限價批股，但市場承接力不俗，至少上周五收市價62.25元，就比新橋減持價60.6元，仲有2.7%水位。

利錢厚新橋急食胡

私募基金六年投資期唔算短，但○四年新橋僅花12.5億人仔，換來市值接近190億港元的平保，計埋去年已收取114億元現金，回報之高，難怪咁急想鎖定利潤。

講番平保，今年股價累計跌咗8.5%，只及A股跌幅一半，踏入一○年內地股市無段好睇，投資收入恐怕難與○九年相提並論，以一○年市盈率26.3倍計唔平，即使新橋未必急於再沽，但手上股票只有六十日禁售期，心理上始終有影響，想博反彈，筆者認為較佳入市價在50至55元左右。