本文重點
歐美股市上周五再度上演「高台跳水」，除非A股有奇迹出現，否則本周初港股難免再次尋底，下試首季低位19,400點水平支持。上周五藥業股成逆市奇葩，其中獲大摩唱好嘅中國生物製藥（01177），股價逆市上升22%，收報3.94元，可見「摩笛」威力。其他上升嘅藥業股還有維奧藥業（01164）、華瀚生物（00587）、利君（02005）、羅欣藥業（08058）等。
自四月中旬內地股指期貨推出之後，A股不斷向下尋底，惹來期貨拖低現貨之論。但其實，若仔細一看，目前股指期貨開戶門檻高，參與者數目不過一、兩萬戶，保證金額約數百億元人仔，與A股總體市值逾20萬億元人仔相比，簡直小巫見大巫，故不應硬把股指期貨看待成跌市「元兇」，反而市場資金由去年極寬變成今年趨緊，先至係股市反覆尋底嘅主因。
內地嘅電腦產品出口持續上升，今年一月，內地出口嘅電腦產品共144億美元，同比增長43%，其中又以筆記本型電腦出口增長最佳，達63億美元，同比增幅超過六成。專門從事製銷筆記本電腦外殼業務嘅巨騰（03336），去年度營業額達74.6億元，純利7億元，已穩佔全球市場三成份額。
提升產能擴市佔率
去年三月，公司收購鎂合金外殼製造商華元，而截至去年底，公司共設有七家廠房，總年產能可達6,000萬套，而位於江蘇泰州嘅合資廠房，主力生產筆記本型電腦外殼，年產能可達1,000萬套。今年公司將斥資6億元興建新廠，屆時年產能可提升至7,200萬套，目標係喺未來數年將市佔率進一步提升至40%。
過去兩年全球經濟不景，但筆記本電腦嘅銷售卻不跌反升，主要係用家傾向選擇價單較相宜，而且體積較小嘅電腦產品。正正由於筆記本電腦正逐步取代桌上電腦，預期未來數年筆記本電腦銷售前景可保持增長。巨騰往績良好，喺體現生產上嘅規模效益及市場自然增長帶動下，估計今年純利9億元，預測市盈率8.5倍，如此估值，投資者可以坐得安心。
順帶一提，由於勢色唔對，阿莊上周五已把周初買入博反彈嘅40萬股中芯（00981）沽出，平均價0.71元。