15/05/2010

播放本新聞相關短片
查詢股票編號

太子手記:小股東望恒生有升有息

本文重點
太子尋日專登走咗去恒生(00011)嘅AGM,有啲小股東就關心,點解恒生喺舊年股價低迷唔出手回購托住個價。另一個小股東亦力數當年九七、九八年金融風暴時,恒生不知幾好,日日回購股份。但舊年不但無回購,仲大減股息。

勸梁太勿減股息

小股東仲趁機提醒恒生個董事會,尤其係梁太(副董事長兼行政總裁梁高美懿),好希望恒生能夠秉承傳統穩健的作風,唔好減股息,唔好影響股東同客戶對恒生的觀感。

另一位小股東就大讚之前主政嘅柯大俠(前副董事長柯清輝),話喺柯大俠領導下,恒生舊年既無賣迷債又無持有次按,兼且大派股息。又話舊年滙豐股價比人踩到死嘅時候,身為阿仔的恒生可以置身事外,無受影響,好多謝柯大俠,即時博得全場掌聲,似乎呢番說話係成班小股東嘅心聲。