內地通脹形勢嚴峻，大家都有心理準備，人行隨時加息。阿莊聽啲表叔線話，呢次「阿爺」動真格，大家都心裏有數，守守規矩，免得再惹來更多「調控」措施出台。佢仲話，呢轉滬綜指要回落至2,500點水平才見支持。聽佢咁講，呢一刻大家要繼續「戒急用忍」，保留實力最重要！

放大圖片	放大圖片	放大圖片

雖然係大淡市，但仍有中資股逆市上揚。近日本欄提及嘅瑞金礦業（00246）再升4.7%，報13.98元。此外，東方電氣（01072）一度升上50.65元，收報50元，升5.4%。

查實，喺發電設備製造商之中，經重整後嘅東氣進一步鞏固龍頭地位，去年經營成績理想，賺17.36億元（人民幣．下同），按年增長達2.8倍。

食正環保能源概念

東氣製造嘅發電設備包括火、水、風、核電四大類，雖然去年火電設備仍為其經營溢利嘅主要來源，但風電設備增長稱冠，而其核電設備業務亦漸見規模，發展前景獲市場睇好，二者嘅環保能源概念，為公司估值增添溢價。

今年首季，東氣實現淨利潤4.7億元，同比增長57%，每股盈利0.47元，季內新承接定單87億元。阿莊估計，東氣中期純利可挑戰10億元大關，全年純利有望重返○六年或○七年度水平，現價預測市盈率約十六至十七倍，以其市佔率及盈利增長前景，估值並不算昂貴。

睇走勢，是浪其股價可挑戰五十二周高位52.35元，若市況未配合，破位不成，可待回試45至47元承接再分注收集。