本文重點
作為大藍籌，中移（00941）一直係唔少股民嘅心頭好。不過，近年因為競爭加劇而搞到公司增長大幅放緩，股價表現大不如前，令好多中移「粉絲」大為失望。唔知係咪咁嘅原因，尋日中移股東會就特別吸引到好多股東到場，就連董事長王建宙都話，尋日嘅股東會係咁多年嚟最多小股東到場嘅一次。
王總每三個鐘Check價
尋日中移小股東嘅提問較往年為多，而且相當有質素，好似有位小股東話，好多股東都係以百幾蚊買入中移股份，但依家公司已經變為公用股，問王總點樣幫公司重拾增長。王總話佢無時無刻都以提高股東回報為責任，仲話無論去到邊度都會最少每三個鐘Check吓股價。至於點樣幫公司重拾增長，王總當然唔介意將近期嘅「代表作」─入股浦發行嘅賣點，再向小股東講解多一次啦。
中移一位股東提到，公司每年都將又大又厚嘅年報寄畀股東，塞爆晒佢哋嘅信箱。公司回應話，寄年報畀股東係相關法例規定，但可選擇以光碟代替喎。