11/05/2010

播放本新聞相關短片
查詢股票編號

「1028」雙股先後腰斬

俗語話「唔怕生壞命,最怕改錯名」,估唔到連公司上市都應驗。話說上個禮拜三隻上市「腰斬」新股之一嘅天源礦業(01028),個股票編號竟然同去年十月擱置上市嘅卓越置業一樣,兩家公司同一個冧巴,事隔唔夠一年竟然同樣上市要「腰斬」,你都咪話唔邪!

根據香港公司上市慣例,新上市公司會選擇捐50萬元或者100萬元畀公益金,如果捐多啲,可以選擇嘅股票編號就會多啲,又或者你可以選擇唔捐,港交所(00388)就會分個冧巴畀你。

天源卓越用同一冧巴

不過,好似天源同埋卓越咁,事隔唔夠一年就用番同一個冧巴嘅情況就比較少見,而且兩家公司最後都同一命運,就真係幾得人驚。

其實不祥號碼古今中外都有,好似中國人好棹忌「四」字,外國人就好怕「十三」,連樓層有時都會跳過呢啲冧巴。不過,講到底都係信則有,不信則無啦。