本文重點
內地華遠地產董事長任志強經常快人快語，唔喜歡嘅人就覺得佢成日以發展商身份講風涼話。佢尋日出席大連一個房地產高峰論壇嘅時候就畀人掟鞋，難得佢反應好快，自嘲獲得「總統待遇」，之後就若無其事繼續發表演說。
自嘲獲「總統待遇」
任志強因乜事畀人掟鞋呢？話說佢上台之前，大會播放熱爆內地嘅電視劇集《蝸居》短片，其後佢上台就話：「我沒看過《蝸居》，但是我發現裏頭那個人（宋思明）開的車相當好，如果他能開得起這樣的車，那我想他的蝸居也是相當大的」。太子睇過套劇，任志強有點張冠李戴，佢以為宋思明係住喺蝸居呢！
話音未落，台下有位男子向台上掟兩隻鞋，仲大叫「去死吧！」台下有觀眾跟住起哄拍手。「掟鞋男」之後向門口走去，任志強則自嘲解窘。