港股由金融海嘯後低位翻一番，但對比○七年高峰31,958點，今日計港股需要再升五成四，方能舊地重遊。唔講可能唔知，儘管金融海嘯重挫歐美，傳統經濟發達的西方消費國家無一幸免，但西方奢侈品市場的復原能力，又比實體經濟強勁得多。一個計算頂級紅酒價格的指數liv-ex，○八年海嘯時由高位264點跌落204點，跌幅只不過係區區22.7%，相信比起大部分股票市場指數的災難式插水，跌幅濕濕碎，近期liv-ex經已升番去264.95點，超越海嘯高峰，意味着中港同胞至愛嘅法國五大酒莊酒價，早就再創新高。

紅酒身價回到海嘯前

業內解釋，由於亞洲新興市場對紅酒消費增長強勁，加埋近年多咗紅酒基金，大量熱錢湧入支持酒價屢創新高，筆者真的有小小後悔，唔及早去「醉生夢死」，在海嘯前押注當時像如雨後春筍般湧現的紅酒基金！

大摩近年就鍾意用「X日上升機會有Y%」形式撰寫報告，最新係「預言」渣打（02888）未來三十日上升機會達八成的報告，理由包括首季營運數據理想、信貸成本持續回落，以及中東及印度零售業務保持增長等。

大摩睇八成機會上升

一日之後，渣打出來的首季管理層報告的確「符合」大摩估計，客戶收入創新高，較○九年第一季度升超過20%，佔商業銀行業務總收入80%以上。不難令人聯想在首季指引曝光前，恐怕大摩必定掌握一些數字。至於大摩報告的後半部分，渣打股價未來三十日是否升多跌少？的確要看市場狀況了。

從基本因素考慮，業務集中新興市場，在歐美生意唔多的渣打的確吸引，唔單止基於○八年及○九年，大部分金融機構盈利受到次按衝擊大幅倒退之下，渣打依然維持增長；目前估值亦大幅低於歷史水平，令筆者相信大摩的預言，在首季營運指引曝光後，可能兌現。

綜合市場預測，渣打一○及一一年純利分別為39.83億美元及47.45億美元，相當於17.8%及19.1%增長，亦即十四倍市盈率，扣除○八年扭曲的紀錄，渣打往績市盈率介乎十三至二十五倍，由分析員的盈利預測，不見得渣打估值應處於歷史水平下限，史提芬認為現市況是買入的好時機。