市傳中國農業銀行部署七月喺中、港兩地掛牌，如此大型嘅集資活動喺七月進行，係咪意味嚟緊市況真係「五窮」、「六絕」、「七翻身」呢？講起內銀股，考慮到風險因素，目前估值唔算便宜，反而內地保險股可塑性較高，高盛近日推介太保（02601），目標價睇38.1元，且看季內有冇機會執平貨。

放大圖片	放大圖片	放大圖片

繼政府出招規管新樓推售手法後，市建局隨即推出八項措施，協助遏止炒風，包括禁止合作發展商進行內部認購單位，而首批單位只可售予個人名義買家等，呢次舉措正好回應市場質疑市建局係公營機構，銷售重建項目不應全以市場角度出發嘅訴求。

查實唔係每個發展商都有跟市建局合作，故相關措施對地產股只係有個別影響，反而政府頻頻出招，唔多唔少影響樓市氣氛，昨日美聯（01200）再瀉4.1%，收報6.9元，較四月中旬高位累跌約25%。阿莊相信，市建局將促使發展商加快自行參與舊區重建，免受掣肘。

呢期市況淡靜，能突圍而上嘅股票，真係有料到。昨日阿莊留意隻南車時代（03898），股價逆市上升，創五十二周新高17.82元，埋單報17.8元，升6.2%。

毛利率更勝一籌

今年首季，南車時代銷售額增近一倍至10.31億元人民幣，淨利潤同比增長90%至1.52億元人民幣，雖然由於前兩年收購嘅項目毛利率較低，以致整體毛利率輕微下跌，但銷售增長迅速，應有助抵銷相關影響。

雖然中國南車（01766）及南車時代均為未來數年政府積極投入擴建鐵路網絡嘅受益者，惟有別於中國南車主要做鐵路機車、貨車及動車組等，南車時代從事製銷鐵路機車變流器、控制系統及電氣系統業務，毛利率較優勝。

南車時代派發末期息每股0.195元人民幣，將於本月十七日除淨。昨日股價以大成交逆市突圍，論走勢確實「靚仔」，短線回吐守穩17元可小注跟進，目標向19至20元推進，話唔定仲可以博埋月中財息兼收，止蝕位16.5元。