05/05/2010

播放本新聞相關短片
查詢股票編號

太子手記:股神化身卡通賣廣告

股神巴菲特好鍾意扮鬼扮馬,早前扮過八十年代紅極一時嘅搖滾樂隊Gun N'Roses歌手Axl Rose,適逢一年一度巴郡股東會,巴菲特再次親身娛賓。但唔知係咪上次親身上陣反應麻麻,所以今次佢就化身卡通人物,繼續幫佢有份投資嘅公司大賣廣告!

細路提問考起大孖沙

今年嘅股東會以一部搞笑卡通片揭開序幕,巴菲特喺片中扮演神秘百萬富翁俱樂部嘅創辦人,會員係小朋友,小朋友會向巴菲特同其他創辦人,例如微軟嘅蓋茨提問,結果因為小朋友的提問太刁鑽,令班大孖沙目瞪口呆,仲落荒而逃添!

卡通之後播放影片,播番巴菲特啲生活照,包括上次扮巨星、做棒球員嘅場面,仲有佢一邊飲可樂,同食See's Candies牌朱古力嘅片段添!股神巴菲特就梗係唔會就咁幫人哋賣廣告啦,呢兩隻產品都係巴郡有份投資㗎!然後就開始問答環節,巴菲特表示,巴郡首季賺咗36億美元,扭轉上年蝕15億美元嘅困局。