本文重點
歐洲債務危機困擾全球金融市場，美股道指前晚大插，拖累亞太區股市昨日全面下挫，恒指曾低見20,853點，收市報20,949點。從圖表走勢分析，恒指經已跌穿今年二月以來嘅上升軌，50日線亦已失守，唔排除呢轉要踩到落20,500點水平才有似樣嘅反彈。
昨日指數顯著下跌，但唔少個股表現突出，游資一於炒股唔炒市。醫藥股愈炒愈高，武夷藥業（01889）升2.7%，神威藥業（02877）及聯邦製藥（03933）分別升3%及2.65%。
炒家翻兜汽車股
國策股逆市發圍，汽車股華晨（01114）及駿威（00203）分別升9.7%及3.1%。
講起汽車股，去年內地汽車銷量達1,360萬輛，行內預計今年銷量可挑戰1,600萬輛，難怪炒家見汽車股回得咁上下又睇位翻兜。其實除汽車股外，汽車周邊行業亦為受益者，就如從事產銷子午輪胎鋼線嘅興達國際（01899），去年業績理想，收益增長10.7%至38.64億元（人民幣．下同）；純利5.48億元，增長31%；每股盈利（攤薄）39.36分，每股派息10港仙。盈利增長較快，一來受惠汽車銷情大旺，帶動產品需求回升；二來公司銷售成本控制得宜，毛利率升至30.6%。
據興達嘅業績披露，去年子午輪胎鋼簾線需求強勁增長之勢，喺今年初嘅淡季仍然延續。由於入行門檻高，集團嘅壟斷地位穩固，相信今年可繼續以佳績示人。
再睇集團股價走勢，近兩周升上5元樓上沽壓不大，昨日逆市靠穩，收報5.4元，往績市盈率十二倍，論估值，股價仍有條件更上一層樓，目標衝6元關，止蝕位5.1元。