內地股市低開，拖累港股表現。志強早段見港股低開逾200點，率先以0.061元盡沽500萬股華億傳媒（00419），睇番收市見華億倒跌，再一次證明有食要食。至於光大國際（00257）能夠逆市上升，證明係好嘢，值得中線持有。
航天萬源（01185）沉靜咗一段時間，股價在0.9元亦整固已久，又到收集時候，不妨買定些少等運到。經近年多番重組，萬源舊年業績成功扭虧，期內營業額6.63億元，大增2.6倍，盈利7,080萬元。業績反映集團期內的風力發電項目、汽車工業用材料業務及銷售稀土電機與來自電訊設備產品的業務開始步向收成期。
萬源去年底批股後，股價曾一度高見1.46元，之後遇上大市調整，其股價亦反覆回落。至奇係上兩個月大市回升，萬源股價跟唔上，以集團目前幾項業務，全部係食正潮流兼受惠國策，無理由股價表現會咁差。
志強問咗幾個股友，終於有個大陸線人八到個原因，話說去年底萬源曾以0.8元批股，市場反應熱烈，但集團唔肯加碼再批，有心人於是利用手持部分股份質低股價收集，據聞已收得七七八八。只要再有利好消息刺激，萬源隨時再展新升浪。