本文重點
恒指昨日下跌，抵銷咗周一嘅升幅，彈唔起其中一個原因係A股不振，影響中資股氣氛。不過，阿莊始終認為，從內地樓市流出嘅資金始終要搵出路，實力中資股，尤其係內需及醫藥等國策股，股價可望長升長有。
本地零售股呢期相當狂野，卓悅（00653）本月以來累計升幅超過八成；昨日下午停牌有待宣布配股消息嘅周生生（00116），同期升幅亦超過四成。究竟係呢類股早前估值過低，抑或行業前景真係睇得咁好，阿莊亦搞唔清楚，只係覺得呢類股特色都係長期「貨乾」，遇上有資金燒冷灶，股價挾到咁上下，便以集資開拓新市場等各種理由，配股畀班基金大炒。若然冇貨底喺手，高追宜三思。
原料藥業務保強勢
醫藥股炒風沒完沒了。阿莊月中推介嘅中國製藥（01093）昨日再創五十二周新高6.26元，論估值應該仲有得去。另一隻可留意嘅醫藥股係新華製藥（00719）。該股早幾年經營表現都相對平穩，去年積極調整產品組合，提升盈利能力，業績出現突破，去年度營業額22.96億元（人民幣．下同），按年增長10%；純利9,968萬元，增長2.32倍；每股盈利0.218元，派息每股5分。
年內，旗下化學原料藥業務經營溢利增長兩倍至1.08億元，而製劑業務經營溢利為2,505萬元，增幅56%。公司生產嘅咖啡因、茶碱、布洛芬產品已通過歐盟EDQM嘅覆查和審核，主導原料藥產品已躋身歐美高端市場。據內地傳媒報道，治療柏金遜綜合症嘅特效藥─左旋多巴，過往全球原料藥係由日本生產，今年起將由新華製藥生產，故料今年其原料藥業務可保持強勢。
內銷方面，醫改為製劑業務帶來商機，公司相關業務已漸見規模，增長前景樂觀。新華製藥昨日收市報4.16元（港元．下同），今年預測市盈率介乎十二至十三倍，若首兩季經營數字對辦，估值有上調空間，目標叩5元大關，短線調整守住4元關，可小注一試，10日線支持在3.85至3.9元。