28/04/2010

播放本新聞相關短片
查詢股票編號

任志剛幫中大做研究

前金管局總裁任志剛過完冷河,逐步浮面,繼喺人行做後台嘅中國金融學會任執行副會長之後,太子聽聞佢仲做埋中文大學新設嘅全球經濟及金融研究所傑出研究員,嚟緊將會同歐元之父蒙代爾等諾貝爾獎得主,齊齊作育英才。今個星期四,佢仲會面對傳媒,又以新嘅身份同大家見面。

做傑出研究員育專才

聽講,呢個全球經濟及金融研究所係中大之前新成立,目的係幫內地經濟體系籌謀獻策,依家仲請埋任志剛做傑出研究員,同其他教授一齊研究同培訓人才,「同事」包括蒙代爾同另一位諾貝爾獎得主莫理斯,真係粒粒巨星。

睇嚟呢個位都幾符合任志剛一貫退休目標,就係為社會同國家繼續貢獻,而且繼中國金融學會執行副會長嘅身份之外,又多一個評論金融市場嘅身份同平台。任志剛心繫香港同金融市場,一直都有同大家分享見解,但係今次用傑出研究員身份出嚟講嘢,自由度同深入度更勝一籌。