志強的組合穩穩陣陣，持有光國（00257）作中線投資；短炒華億傳媒（00419）上周五逆市上升兼高收，梗係唔走住，等升高些少再套利。

個市係就係麻麻，但股有股炒，志強一向炒股唔炒市，只要大市目前仍係調整，並非玩完，志強一於少理，繼續股仔萬歲。今日吼威靈控股（00382），睇番圖表，股價調整接近完成，只要成交配合，隨時再爆升浪。

威靈上周宣布終止收購無錫小天鵝旗下華印電器全數100%股權，集團繼續物色投資商機，進一步發展其業務。股價對呢個消息反應有限，反而係之前集團曾以每股0.42元配股集資，以現價0.44元計算，接咗貨班投資者，現價計只錄得微利，呢個先係威靈遲吓或炒上的誘因。

去年業績成功扭虧

大股東美的配股後，仍持有六成以上股權，可見之前係股權過度集中，街貨流通量唔夠，交投唔活躍，令威靈股價一直落後同業。去年業績成功扭虧，料在「家電下鄉」政策扶持下，威靈今年業績可更勝去年，前景睇高一線，配股調整完成，現價上車目標0.5元，止蝕以0.42元配股價作參考。