中訊軟件（00299）連日逆市上升，上周五高收1.34元，升8仙，股價已遠遠拋離各條平均線，MACD剛現雙牛買貨訊號，加上有大成交配合，可確認升勢展開，一旦升穿1.37元嘅圓底阻力，照度上去，短期股價最少可見1.59元。

財政穩健值得加分

中訊業務主要係向資訊科技行業嘅客戶提供外包軟件開發服務，亦提供技術支援，客戶主要來自日本，包括NEC及其附屬公司等。

○九年度（十二月結）上半年，中訊業務受金融海嘯影響，盈利減少34.6%至3,937萬元，但下半年環球經濟好轉，集團業務亦明顯轉佳，全年盈利達1.03億元，每股獲利9.28仙，派末期息5仙。

二○一○年全球經濟動力轉強，集團將憑着開拓日本市場嘅優勢，加大外包軟件嘅發展，亦同時加大對高端項目嘅投入，預期未來數年可回復高速增長，保守估計今年盈利1.5億元，每股獲利0.134元，市盈率十倍。另外，集團手持現金5.94億元，全無銀行借貸，財政好健全，值得加分。

中訊軟件（00299）　目標價：1.59元　止蝕價：1.25元