港股繼續冇方向，表現反覆。波動市下，揀選方面宜挑選一些較具防守力的股份，好似體育用品股正係其中之一。美克國際（00953）主要在內地製銷「美克」品牌的運動服飾產品，包括鞋類、服裝及配飾等。隨着全球經濟復甦，加上內地致力推動內需，消費力有增無減，而四年一度的世界盃亦踏入倒數階段，體育用品股值得憧憬。況且，集團今年二月份才上市，屬於半新股，市場上冇乜蟹貨，因此要炒起上來就更加容易落鑊。
美克國際IPO時反應非常熱烈，獲逾四百倍的超額認購，惜上市首日已跌穿招股價1.43元，表現令人大跌眼鏡，不過在內需這個大前提支持下，好快已經收復招股價並企穩其上，昨日逆市升1.8%，收報1.61元，一旦成功突破上次高位1.64元，後市料大有上漲空間，目標可先睇2元，穿1.5元止蝕。
至於配腳方面，就揀來近日股價見異動的直真科技（02371）。集團由去年至今一直動作多多，繼年初完成收購內地戶外二極管顯示屏項目後，最新又宣布擬收購湖南移動49%股權，而其股價已成功突破下降軌，走勢轉佳，目標睇2.2元，穿1.75元止蝕。
此外，合動能源（00578）亦值得留意。皆因集團近日受旗下煤礦復工的消息刺激，股價成功見底反彈，昨日更突破旗形而上，且成交配合，料反彈未完，目標價睇0.5元，止蝕位0.37元。