長線而言，恒指由海嘯高位32,000點跌到接近10,600點，中間位正好在21,300點，同現水平距離唔遠，奇怪係身邊認定股市樓市高處不勝寒而拒絕入市的朋友唔少。

港股現價唔算高

的確，過去十多年，我哋經歷了九七金融風暴、二千年科網股災、○三年沙士同埋○七年金融海嘯，每三至四年就有一次股市災難發生。但要知道分析員對一間公司或整個股市製作估值模型，上市企業盈利高低固然重要，但預期市場利率高低同樣重要。試想反映中期利率走勢的十年美債，目前孳息不過3.5厘左右，一一年藍籌平均股息率有3.6厘，到底債券定股票吸引，可一目了然。

睇番現時拆息在接近零水平，一○年藍籌股平均市盈率十四倍，即使唔算超級便宜，但肯定同股災前一般去到二十至二十二倍有一段距離，筆者認為現在入市風險其實唔高，問題只係閣下能否揀到有基本因素支持嘅股票，如果賭的是意馬（00585）之流，筆者建議不如去澳門玩鋪大小好過。

近幾個月，基金將內需股舞到半天高，當然唔少公司趁機會「盡力」餵飽班基金大戶，愛股雨潤食品（01068）同埋半年前以介紹形式上市，最後因為錯價搞到滿城風雨的亞洲果業（00073），雙雙宣布批股集資。

批股盡入強者手

雨潤連埋股東賣舊股，總配售規模達40億元，市場需要時間消化，尋日遇正跌市，跌穿批股價一啲都唔叫人感到意外。反之亞果當日以介紹形式上市，基金根本無從參與買入足夠貨底，故今次配股基金反應頗踴躍，大部分貨源落入有名基金手上，富達、BlackRock及Wellington通通有份，由批完股後股價企穩6.05元，比批股價5.7元高出6.1%所見，大抵反映接貨者亦非短癮買來賣之輩。

亞果本在倫敦創業板掛牌，去年十一月回港第二上市，結果因錯價事件令其聲名大噪。雖有云一次不忠百次不用，但似乎股市投資者特別善忘，過去兩年蒙牛（02319）及中信泰富（00267）令史提芬學識，在股市戴住有色眼鏡睇股票，無乜着數。姑勿論點，今次亞果批股集資3.88億元，主要用作果園收購，計劃買下1萬畝擁有大約110萬棵柑橘類的果園及其配套設施。而今次批股亦可謂一石二鳥之舉，成功集資之外，亦可以引入幾個大基金股東，批股陰霾也得以消除。目下市盈率唔夠十二倍的內需股唔多，既然大孖沙不計前嫌，股民也不妨小注一試。