21/04/2010

播放本新聞相關短片
查詢股票編號

Fundman睇市:武藥勝在現金多

高盛被美國證交提出指控的事件稍為淡化,被重創的金融股紛紛反彈,道指前晚升番73點,而港股在滙控(00005)及中移(00941)貢獻近百點進帳下,也補回了前日21,582點至21,788點的下跌裂口,恒指升218點,報21,623點,美中不足係成交唔夠,得627億元,比早前兩日跌市都要少,可見入市撈底的,仲係相當審慎。

藥業股走勢一枝獨秀,佔去升幅榜內大部分位置,睇睇這些名字,維奧醫藥(01164)、杏林醫療(08130)、積華生物醫藥(02327)及早前推介過的瑞年(02010),升幅介乎12至29%,唔通真係中央政府打壓樓市,無嘢好炒,大孖沙攞番去年內地8,500億元人民幣醫改方案出嚟翻叮?

藥業股再難搵平貨

本來幾鍾意醫藥股,但一睇到近期升完再升之後,大部分估值高到離譜,興趣即時大減,龍頭股國藥(01099)六十六倍PE經已唔算最貴,可見一二!雖然俗語話好嘢無平,但見藥業股炒到火紅火綠,無辦法唔尋吓寶。平日鮮有炒作的武夷藥業(01889),連升幾日,股價由0.8元水平,升到上1.03元,若非醫藥股當炒加上剛剛出業績,交投淡靜居多。

與不少經催谷後上市的公司模式有點相似,睇番歷史,○七年上市的武藥,同年係業績高峰期,當年賺2.72億元(人民幣.下同),翌年跌至2.09億元,去年為1.34億元,只及○七年一半,難怪搵來搵去,近半年經已唔見再有外資行為其撰寫報告,再睇股價,同樣比當年招股價1.8元低四成三。集團○九年業績倒退35.8%,但因一早出咗盈警,加埋中期盈利已經跌57%,故屬預期之內,管理層解釋係金融海嘯影響藥品需求,加埋○八年底落的廣告合同要如期履行,令廣告及人工成本上漲所致。

每股持現金近0.7元

從往績表現,這間「小國藥」能否像股民一廂情願般,享受到○九年中央新醫改方案的好處,仲需要時間證明,筆者認為武夷藥業仲有留意價值,是基於其手上現金實在太豐厚,去年底無負債之餘,仲有10.5億元現金,相當於11.9億或者每股0.696港元,亦即係股價六成八係現金,業績的能見度雖然低,但往績市盈率11.5倍,平過大部分藥業股一條街,如果撇除現金,市盈率得4.2倍,即使檔生意只係維持1億至1.2億元人民幣利潤,亦都真係平得幾離譜。

當然,現金唔派出嚟又無發展,股東根本享受唔到分毫,但若然一如年報展望中所指,會用來發展農村市場及擴大銷售網絡,將是小股東之福,股民不妨留意公司對配合醫改發展的決心到底有幾大。

史提芬