儘管內地要打壓樓市，但樓價仍然愈升愈有，內房股大豐收，從近日相繼公布嘅業績已可見。今日推介嘅中國地產（01838）前日公布業績，盈利增長認真誇張達14.64倍，但相對股價就偏低得離譜，現水平值得趁低吸納，股價升一兩個開，絕對唔出奇。
○九年度（十二月結），中國地產營業額12.87億元，減26%；盈利96億元，大升14.64倍，每股獲利5.31元，市盈率只有0.5倍（上市港股中相信難搵到第二隻）。若撇除物業重估增值，盈利7億元，市盈率亦只有6.8倍。
中國地產以上海同重慶為發展基地，食正兩地未來嘅發展大趨勢，預期未來數年盈利仍可保持強勁增長勢頭。
中國地產另一吸引之處，是其資產折讓之大，亦達離譜地步，截至○九年底止，每股資產淨值15.77元，市帳率0.168倍。現時內房股嘅市帳率普遍都超過兩倍，中國地產以0.5倍計，股價值7.88元；以0.3倍計，值4.73元。
中國地產大股東持股74.62%，估計親朋戚友揸一大截，街外貨源疏落，股價要升亦可以好誇張，買貨要趁早。