見市況悶悶哋，繼續在○九年上市的半新股中尋寶，發現內需概念股份中，生產奶粉的澳優乳業（01717）都算失威。公司去年十月以每股4元招股上市，隨後股價唔使幾日已炒上最高7.25元的上市高位，可惜好景不常，隨後幾乎跌足五個月，以昨日收市價5.35元計，雖然承購者仲有三成三帳面利潤，但從抽高後陰陰落的走勢，恐怕除了掛牌頭幾日入貨者之外，之後買貨的通通已變晒大閘蟹。

毒奶事件彰顯優勢

澳優業務簡單，主攻高檔嬰幼兒配方奶粉。自從毒奶粉事件後，內地消費者對奶類產品的安全性倍加關注，大環境應該有利原材料由外國進口，本身在香港上市的澳優，至少在提高知名度方面，都有相當的好處。

睇番背景資料，澳優上市集資9.4億元，按招股計劃，三成用作收購上游資產，另三成發展銷售網絡及推廣，餘下主要作為研發新產品、擴充生產線及一般營運之用。○九年上半年營業額及純利分別為3.21億元（人民幣．下同）及6,516萬元，分別增長83.8%及1.2倍，主要多得主要原材料奶粉價格下降，令毛利率增加4.5個百分點，去到42.5%。

澳優將於本月二十二日出業績，招股時預測全年至少賺1.8億元，對比○六至○八年賺1,185萬、2,237萬及7,053萬，認真快高長大，以55.9億港元市值計，市盈率是27.3倍。

盈利能力跑贏蒙牛

由於本地有乳業股而無奶粉股，故只能搵業務最接近的蒙牛（02319）作比較，其○九年市盈率估計有三十二倍，稍高於澳優。

但睇番毒奶事件前，蒙牛最叻毛利率都係得22.5%，比澳優低一截，要解釋可以有三個可能性，一、澳優品牌令「原材料」增值嘅能力比蒙牛更勁；二、奶粉市場競爭無紙包奶咁大；三、上市前業績經過粉飾。基於過去幾年澳優毛利率都有36至48%，持續高於紙包奶，第三個可能性應該可以忽略，況且由彭博資訊顯示，除大股東外，澳優主要股東大部分是長線基金，首十七大股東揸貨八成七，令向來抗拒半新股的筆者較為安心。

睇番澳優上市後股價最低曾見過4.77元，估計跌穿機會唔大（否則全部上市後買貨嘅大孖沙都要輸錢），換句話說，依家買入最多輸一成，跌穿止蝕。相反，其估值在內需股中屬合理，盈利基數又無蒙牛咁大，當落後股炒，一試無妨。