金融海嘯揭發唔少上市公司亂派花紅，搞到依家股東簡直聞「紅」色變。俄鋁（00486）尋日就公布派發上市花紅，當中老闆歐柏嘉（Oleg Deripaska）個人獨得超過5.4億元，不過，俄鋁嘅股東唔使驚，皆因呢批花紅會用股份形式派發，影響唔到公司。
俄鋁今次總共會向管理層派發約8,426萬美元（約6.57億港元）花紅，當中歐柏嘉佔約7,031萬美元（約5.48億港元），會全部用股份派發；至於其他高級管理層嘅1,395萬美元（約1.08億元）花紅，股份及現金分佔60%及40%。換句話說，其實只有558萬美元（約4,352萬港元）係現金花紅，批紅股仲有兩年禁售期添。