阿莊喺上周五提及大笨象（00005）落後，可留意相關認購證，果然捉正財路，上周五大笨象重上80元關，高位見82元，收報81.95元，升3%。

放大圖片

放大圖片

睇嚟睇去，阿莊始終覺得，炒人仔升值，再加上本周股指期貨推出，A股可以睇好。中國人壽（02628）值博，所以上周五忍唔住手，喺37.9元買入20,000股，諗住短炒一轉。

上周中興通訊（00763）宣布去年度業績，純利24.58億元人民幣，增長48%，末期息每股30分人民幣，更一如預期再次派送紅股，今次係10送5，長揸呢隻優質股，仲使咩日日頻頻撲撲呢？

內地工信部等八部委聯合發布《關於推進第三代移動通信網絡建設的意見》，3G建設投資將再創新高，作為龍頭企業嘅中興發展將更上一層樓。

中興帶挈盈利穩增

講開中興，去年其終端業務營業收入增長34%，毛利率亦上升2.4個百分點至26.14%。專門向中興供應無線通訊天線及基站射頻子系統產品嘅摩比發展（00947），應該受惠不淺。

翻查摩比嘅招股書，中興向摩比嘅採購額佔總收入比例，○六至○八年度分別為46.2%、39.7%及35.4%，而去年首八個月嘅比重則為36.7%，金額為2.3億元人民幣。

此外，摩比部分主要股東亦來自中興嘅管理層，可見二者關係密切。若然中興手機業務繼續錄得好表現，相信摩比唔會差得去邊。

摩比將於今日宣布去年度業績，其股價上周五已見異動，上升10.86%，收市報3.47元，成交金額亦增加至2,946萬元。若業績對辦，估計呢轉可以向4元關直闖，跌穿3.15元止蝕。