本文重點
次季恒指以21,000點為起步點，市場焦點放喺本月中旬內地A股市場推出股指期貨、大型企業首季業績表現，以及五月初中美兩國戰略及經濟對話。阿莊認為，雖然暫未見到有資金重新流入港股，但首季港股經已試底，結果係唔多跌得落，故對於次季股市表現並不悲觀，估計恒指波幅介乎20,500至22,000點。
首季股市焦點喺二、三線股而非大價股，但阿莊估計，此情況有望喺次季扭轉，內銀及保險股均可高度關注。交通銀行（03328）宣布業績後，大行評價正面，相信股價亦已消化了供股嘅消息，季內股價目標上試10至11元水平。此外，上周阿莊推介嘅中國人壽（02628）走勢亦對辦，上周四以全日高位38元收市，升2%，有跟進者，可以繼續持有。
出口股亦會成市場焦點，航運股可留意中海集運（02866）、中海發展（01138）以及中遠太平洋（01199）。歐、美經濟逐步回暖，電子消費品代工需求正在回升，富士康（02038）乃值博之選。
設備使用率料回升
富士康將於本月中公布去年度業績，公司早前已就此發盈警，由於為意料中事，故見股價未有出現太大沽壓。上周四，該股高位曾見8.5元，收報8.49元，升3.6%，似乎又再醞釀開快車！
無可否認，今年內地勞工成本上漲，對富士康構成一定嘅成本壓力，但阿莊相信，更重要嘅因素，應該係睇海外市場復甦嘅進度。據大摩早前發表嘅研究報告指出，諾基亞將於今年次季恢復向富士康外判電路板組裝，估計銷售量或可回復至○八年度嘅水平，有助提升設備使用率。另外，預期諾基亞未來將調撥更多資源拓展軟件或內容，或將更多工序外判，富士康有機會成受益者。
上周富士康股價已重上50日線，走勢轉強，短線若成氣候，目標再試衝10元關，穿8元止蝕。