估佢唔到，上周五港股在最後一個交易小時，無聲無息地挾高，恒指倒升274點，收報21,053點，兩萬一又再失而復得，睇番三點前成交375億元，埋單飆上610億元，即最後一小時成交達200多億元，春江鴨的熱錢多到唔講得笑，睇三月期指大高水收市，似乎好友唔想結算價太過肉酸。
近期歐元被希臘財務危機抽後腳，兌美元級級落，但對歐元收入為主的思捷（00330），股價影響微乎其微，一來思捷本身估值唔貴，預期市盈率只係十五倍左右，歐洲的時裝批發業務正從谷底復甦，可以抵銷歐元貶值的影響外，自從由華創（00291）手上回購中國合營項目，市場憧憬在全資管理下，中國才是未來增長動力來源，思捷沾上了更多內需概念，對整體市場評價的幫助自是不言而喻。
回顧二月初，創辦人之一邢李O減持股份後，手上持股已跌至1.78%或者2,280萬股，再沽影響力有限，配股後股價穩步從53.25元拾級向上，無懼市況波動，相信貨源落入強者手中，上周五股價重上60元樓上，亦升破10日線的60.11元，技術走勢向好，短期目標於65至70元之間，一啲都唔算過分。
思捷（00330） 目標價：70.0元 止蝕價：58.5元