有時世界都幾荒謬，祖國同胞辛苦捱騾仔工資得幾蚊美元一日，生產埋啲平靚正貨物供應美國，收美元返嚟仲要借番畀佢哋消費，到頭來仲要被責罵匯價同貨物太平！

中央難讓人仔升值

到底今次中央會唔會息事寧人，「係咁意」畀人民幣升值？睇番○五年匯改以來，人民幣兌美元累升一成八，美對華貿易逆差反而有擴大迹象。今年初，中國出口剛止跌回升，金融海嘯後亞洲出口國普遍面對產能過剩情況，這時候係咪畀人民幣升值令出口競爭優勢減低，睇怕只係五五波，尤其今年無咗4萬億人民幣銀彈政策，維持經濟增長難度大增，睇吓今次中央點回應「使銅銀夾大聲」嘅山姆叔叔。

港股繼續無方向，歸根究柢，重磅股滙控（00005）自從公布令人失望的業績後，股價陰陰落，對港股發展唔多唔少有影響。

多得去年七個城市項目收購提供貢獻，華潤燃氣（01193）去年賺4.44億元，勁升49.3%。

隨着管道接駁滲透率增加，去年公司的燃氣分銷溢利亦有62%升幅，至4.2億元，睇番彭博綜合大行預測，估今年賺5.64億元，預期市盈率28.2倍，高增長繼續支持高估值。

中央大力支持潔淨能源，環保議題受市場高度重視，中國管道燃氣市場無疑屬高增長潛力行業，尤其燃氣公司正轉向燃氣銷售主導，料未來幾年業績可三級跳增長。

除潤燃外，燃氣股選擇唔少，包括被芬佬視為龍頭的新奧燃氣（02688）。

唔似華潤燃氣透過收購出現爆炸性的增長，新奧屬於估值比較低的選擇，理想的核心自然增長及唔錯的經營效率，是新奧最大賣點。

流通量低美中不足

過去四年，新奧純利由2.5億元（人民幣．下同）攀升至6.3億元，大行預測○九年及一○年賺8.14億及10.2億元，相當29.2%及25.3%增長，一○年預期市盈率17.1倍（華潤燃氣為28.2倍），「抵買比率」PEG得0.67倍，顯然估值未完全反映增長條件，或許流通量低是其弱點，因為大股東及十六個持貨最多基金已揸九成二街貨量，但對長線投資者來說，新奧卻是一個理想的價值投資選擇。