為咗配合呢項盛事，滙控○九年度嘅撮要版年報亦用咗新中國總部大樓做封面，大樓旁邊仲有啲大廈未起好，張相嘅前端見到兩名工人，成個構圖靚唔靚就見仁見智，不過佢哋用得呢幅相，一定有佢哋嘅用意。

與英監管談企業遺囑

滙控近年被人多番逼迫後，為重振聲威，都講明未來重點策略係放喺發展中嘅新興市場，所以呢個封面莫非想話畀人知，佢哋貫徹執行策略，走到一個喺度發展緊而又極為重要嘅新興市場——中國，滙控一早就準備就緒喺呢個市場大展拳腳。

講到金融危機，滙控主席葛霖就講到吸取咗教訓，好應該給予監管機構一啲工具，逐步影響由銀行流入經濟嘅信貸供應。佢話滙控正同英國監管當局傾緊，集團需要邊種企業遺囑復原計劃。