本文重點
上星期恒指唔上唔落，波幅得嗰一、兩百點，上周五大市成交更不足500億元。不過，睇歐、美股市上周五收市普遍靠穩，月底基金季結前股指抽上機會仍大，料本周中後期市況會漸趨明朗。踏入上市公司業績期至今，大型企業公布嘅業績，大部分符合或優於市場預期，此乃大市跌唔落嘅其中一個原因。
市場盛傳內地將於四月中旬正式推出股指期貨，而由於開戶門檻高，至今反應並不踴躍，此乃意料中事，相信待運作一段時間，新產品沒有出亂子，當局便會逐步降低開戶門檻。
中國旺旺（00151）最近宣布末期業績，表現優於市場預期，股價做好，而屬同類股嘅康師傅（00322）上周五股價亦創五十二周新高20.6元。去年中國內需強勁，從企業經營表現得到印證。由於今年透過推動內需刺激經濟嘅國策方向未變，內需股將繼續吸引資金進駐，可繼續睇高一線。
內需股續睇高一線
講到內需股，阿莊持有嘅乳品股蒙牛乳業（02319），與新主中糧集團整合資源過後，年內料可展現協同效益。去年上半年蒙牛純利6.61億元人民幣，保守估計去年全年度純利約13億元人民幣，即現價去年預測市盈率不到三十倍，而今年預測市盈率料降至二十三倍左右。
蒙牛喺內地乳業手執牛耳，加上新主喺糧油食品行業嘅龍頭地位，其估值可較同業享有一定溢價，上周股價重上50日線，若短線站穩其上，可確認近月調整完成，目標再衝28至30元阻力區，穿23元止蝕。