本文重點
恒指繼續窄幅上落，睇嚟個市跌唔落，正等候利好消息向上突破。事實上，今年首兩個月大戶都係食白果，難得三月以來市況穩步回升，班大帝又點會放過機會，一於順勢做靚季結盤數。正正由於短線股指表現靠穩，班炒家趁機博大霧翻炒細價股，其中中策集團（00235）昨日以大成交突破0.65元，係咪好事近，不妨等着瞧。
中油香港（00135）昨日股價有異動，重上10元關，若短線能以大成交突破50日線10.2元，可確認調整完成。本月下旬公司宣布業績，話唔定業績後又有注資行動，宜高度關注。
兩會召開至今，領導人對樓市相關嘅評論言辭尚算中性，似乎不會有過激嘅打擊樓市政策出台，故見內房股自本月初反彈過後，未有太大嘅回吐壓力，畢竟早前累計跌幅甚巨，今年以來內房企業銷售數字亦唔係太差，跌唔落亦唔多出奇。
高層變動惹憧憬
去年《深圳市綜合配套改革總體方案》獲國務院批准，深圳市未來嘅發展方向明朗化，對於分屬深圳市窗口公司、專營房地產業務嘅深圳控股（00604），應該係好消息。去年公司主席及總裁易人，今年或現新人事新作風，未來發展值得期待。
作為參考，去年八月公司曾以先舊後新方式按每股3.72元配股集資近11億元。今年一月下旬，公司兩名執董曾喺場內增持，作價喺2.9元水平。
論基本因素，深控有深圳市政府支持，加上深圳市經濟發展向好，照計值博率較高。股價方面，由十二月初高位反覆回落至上月低位，累計跌幅逾三成，暫看2.6至2.7元水平已形成一承接區，本月初以大陽燭重上3元邊後轉向橫行，回吐壓力不大，且成交增加，似在醞釀旗形突破，目標3.4至3.5元水平，穿2.7元止蝕。