李福兆自從八七年股災停市事件，及後落台後，近年都好少公開露面，多數喺泰國及多倫多兩邊走，其他時間就會返嚟香港，同老友見吓面、吹吓水，或者四圍去旅行。佢對上一次喺香港嘅大型活動，就係佢個大孫女結婚，當時喺香港筵開多席，不少金融界都有出席。

太子聽聞，李福兆依家坐郵輪去咗旅行，今個月二十二日，證券商協會三十歲生日，佢就會返嚟做嘉賓。

咁點解佢咁畀面證券商協會呢？據一名股壇前輩講，原來證券商協會與「校長」有好大淵源，證券商協會喺七九年創立，其開辦經費係由遠東交易所鼎力贊助。而遠東交易所正係六九年由「校長」創立。李福兆依家亦係證券商協會名譽會長。

除此之外，證券商協會副主席及永遠名譽會長陳葆心同「校長」素來有交情，亦都係請得郁「校長」嘅原因之一！