本文重點
滙豐銀行上星期日舉辦咗第二屆「滙豐博愛單車百萬行」，當日雖然天氣麻麻哋，不過亦無損滙控集團執行董事霍嘉治嘅興致，佢同多名管理層率領着三百名滙豐員工，連同三千名市民，由吐露港踩單車去沙田，籌得超過300萬元善款。
霍嘉治當日同一百五十位首批出發嘅同事，大清早六點幾就抵達大埔吐露港單車徑進行熱身，跟着喺七點半鳴槍儀式後就浩浩蕩蕩咁出發，仲踩畢全程十公里嘅賽道。霍嘉治話，可以同一班熱心朋友齊齊踩單車，支持一項既環保又健康嘅運動十分有意義。
籌逾300萬善款
滙豐亞太區企業可持續發展總監區佩兒嗰日未有落場，太子收到風，原來係因為農曆新年前，佢踩住單車親自視察是次活動路線嗰陣唔小心跌親，由於負傷在身，所以佢嗰日只好從旁打氣。
滙豐今次籌得嘅逾300萬元善款，會捐畀博愛醫院、教育及社會服務作為經費。