港股昨隨美股上揚，恒指高位見21,257點，收報21,196點，升408點，大市成交643億元。市場氣氛持續改善，細價股交投活躍。阿莊去年底買入嘅中電新能源（00735），股價已連升五個交易日，昨日以平均價0.7元沽出50萬股，獲利4.76萬元。
正正由於市況有改善，阿莊冇打算增持現金，昨日喺沽出中電新能源後，同日再加注中航科工（02357），以3.76元買入10萬股，收市報3.75元。
此外，阿莊好幾次表示要睇位增持嘅中芯（00981），股價始終唔肯回頭，昨日收報0.8元。眼見細價股氣氛唔錯，阿莊亦忍唔住手，昨日以平均價0.79元增持40萬股中芯，睇睇公司洽商引入投資者一事，會否喺今年首季內報佳音。
最近政府賣地成交價唔錯，加上新界新盤高價開售反應仍理想，中小型樓有價有市，做物業代理嘅美聯集團（01200）應該係受益者，股價短線整固過後，應可再挑戰8元大關。
田生可投機跟進
講開又講，從事收購舊樓相關代理業務嘅田生集團（08136），股價喺0.6元邊已橫行大半個月，如今正等候放寬五十年樓齡以上舊樓強制拍賣門檻嘅條例，能否如期喺下月初正式實施，若條例順利實施，公司將可加快收購步伐，盈利前景可睇高一線，留意投機跟進嘅機會。
上周阿莊推介嘅中興通訊（00763），股價升近50元關遇阻，整固兩個交易日後，昨日重現升勢，收報50.4元，升幅逾4%。同屬電訊設備類股份嘅晨訊科技（02000），將於下周公布業績，昨日股價亦有異動，升4.5%，收報1.38元。反正呢期細價股當炒，加上龍頭股中興似謀向上突破，將惠及同類股表現，睇勢晨訊今轉亦有條件一試1.5至1.6元阻力區，可以小注順勢短炒，止蝕訂在10日線1.25元。