本文重點
太子近期喺電視睇到維他奶廣告，原來唔經唔覺維他奶已有七十年歷史，尋日仲舉行咗「Friend祝70年」慶祝會，祝賀維他奶七十年前誕生，太子亦去捧場。維他奶（00345）執行主席羅友禮話，好高興維他奶陪伴港人七十載，同港人度過唔少溫馨快樂時光，佢同其他高層祝酒時，破例以維他奶代替香檳，變成「祝奶會」。
今次嘅慶祝酒會上，維他奶特意推出七十周年70款「個個祝」嘅包裝設計，仲播放維他奶過去的經典廣告。羅友禮表示，維他奶喺一九四○年三月九日面世，嗰陣佢係細路哥，父親羅桂祥為咗推出一種大豆健康飲品，研製咗維他奶出嚟，第一日生產咗九支。
石油危機催生紙盒裝
而佢最難忘係一九七二年，發生石油危機，商品價格飆升六倍，產品銷滯，當時為刺激銷售，就突破傳統，首次推出維他奶紙盒裝，結果證明策略好成功。
羅友禮回想起維他奶過去嘅口號，最深刻係七十年代「維他奶，點止係汽水咁簡單」；而今年維他奶口號係「stand by me」，廣告就以Sell溫情為主。