尋日表現最突出係內房股，啱啱講開北京建設（00925）或者要待中央房地產政策明朗化才再獲注資，如今內房股有轉勢之象，話唔定隨時有料到。

志強以0.86元沽出30萬股彩虹電子（00438），再以0.9元買入30萬股北京建設。內房股扭轉劣勢再獲炒家垂青，志強當然緊貼潮流。

港交所（00388）表示，上半年新股上市仍然鬧哄哄。昨日Z-OBEE（00948）首日掛牌，乘住大市升勢，Z-OBEE打破近日新股「破發」宿命，收報1.87元，較招股價1.8元升3.8%。

Z-OBEE為內地一站式手機應用程式及解決方案的供應商及製造商。自內地引入3G制式後，手機市場又再見活力，Z-OBEE食正換機熱潮。

不過，Z-OBEE招股期間，大市走勢波動，公開招股僅錄得0.5倍超額認購，並以下限1.8元定價，貨源相對集中，唔排除大部分貨仍在保薦人手中。

值得留意嘅係英皇證券（00717）係其聯席帳簿管理人及聯席牽頭經辦人，睇番去年同英證扯上關係的新股，隻隻表現有番咁上下，Z-OBEE晒士又唔大，只要完成收集，隨時突破向上。