港股尋日終於衝破21,000點大關，大升448點，恒指已重上50日線。今個跌浪港股由去年十一月中嘅23,100點回落，調整應可完成，短期有望向22,000點水平前進。
大市轉好，個別有注資概念嘅二線股值得睇高一線。華潤微電子（00597）最近兩個多月股價跑贏大市一大截，相信同市場憧憬注資有關，尋日收0.38元，升2仙，股價正處旗形突破邊緣，一旦破旗而上，升穿前高位0.425阻力，照度上去，股價最少可見0.54元，有逾40%的上升空間，追得過。
華潤微電子○九年上半年業績受金融海嘯影響，由盈轉虧，蝕8,300萬元。不過，管理層表示，去年第二季已轉虧為盈，第三季增長更為顯著，而第四季亦保持良好勢頭，估計今年業績可望轉盈。
華潤微電子同母公司華潤集團合組公司以生產8吋晶圓，華潤微電子佔19%，母公司佔81%，合組公司經一年嘅試產後，今年已正式投產，預期月產量達3萬片晶圓，將為集團帶來新盈利動力。而母公司將持有嘅81%8吋晶圓權益注入華潤微電子，相信亦為期不遠，務求將集團進一步壯大。