執筆時，滙控在倫敦股價幾乎比香港收市跌5%。簡單講句，由業績所見，北美業務可能仲有十二至十八個月時間見紅，而英國方面復甦亦係遙遙無期，香港業務不過在「無咁衰」情況下，成為最大貢獻地區，可惜息差壓力大，仲係倒退收場，似乎成份業績賣點唔多。

恒生「息戒」損吸引力

至於恒生（00011），亦同滙控一樣，面對拆息趨向零水平同存款息口收窄，淨利息收入唔好已經預咗，過去恒生要做滙控隻現金牛，賺幾多派幾多，但在資本充足比率要求提高的預期下，派息將要收斂，對以高息作招徠的恒生來說，並唔係太好的消息。

近年內地富豪湧現，紅酒文化普及令唔少馳名的法國酒莊紅酒愈賣愈貴，老友問有冇興趣投資紅酒期貨，老實講，雖然筆者亦嗜杯中物，但對過萬蚊一樽的「提子汁」期貨，始終難以接受，尤其長遠價值，只能追隨酒評人的主觀口味，感覺實在太被動，倒不如睇睇內地紅酒股有無好的選擇。

唔少人都話中國紅酒需求大，即使○八年面對金融海嘯衝擊，但內地同胞依然飲得盡興，全年灌掉9億支紅酒，雖然按人均數字，較飲酒文化更悠久的歐洲國家仍相距甚遠，但增長潛力卻不容忽視。

內地酒商具成本優勢

論產能，中國同樣不甘後人，好似○八年全國產量便達12億升，追貼新世界產區如澳洲及阿根廷，排全球第六。記得去年到澳洲產酒區Hunter Valley旅行，莊主話採摘葡萄工人時薪，入場費係20澳元（約122.5元人仔），幾乎等於中國葡萄農工成個星期人工，可以想像當紅酒質素提升，若論成本優勢，其他新世界產區係無得揮也。

目前國產與進口各佔內地五成紅酒市場，當中張裕（A：000869）、中糧（00506）旗下長城及王朝（00828），又佔國產貨五成份額，細看數據，紅酒業贏家得天下的情況明顯，張裕邊際利潤35%，幾乎是王朝14.3%的1.4倍，可惜筆者無內地身份證，否則一定買番兩手張裕。再掃落去，上市無耐的通天酒業（00389）觀感唔錯，先撇除上市前業績粉飾的可能性，論毛利，邊際利潤，現金流及增長條件都頗吸引，加埋掛牌後升幅唔大，想將嗜好變成投資，小注可以諗諗。