本文重點
大戶乘大笨象（00005）派業績前挾淡倉，恒指昨日抽上全日高位21,056.93點收市，升448點，大市成交679億元。雖然大笨象公布嘅業績只係中規中矩，但三月開門紅始終係好事，基金大戶會否喺呢個月踢高個市做靚個季結，不妨等着瞧。
一如所料，兩會前中資股成市場焦點，股價低迷嘅內房股成抄底對象，半新股恒大地產（03333）表現似乎較落後，而較細價嘅沿海家園（01124）亦屬初起步，若氣氛尚在，可博後發先至。
「三農」概念股續受追捧，中化肥（00297）急升7.59%，收報4.68元，且看能否以大成交重越50日線4.7元。同類股中，阿莊較喜歡中海化學（03983），事關股價已重上10日、20日及50日線，昨日以大成交衝穿5元大關，收報5.2元。
中海化學主要產銷化肥（尿素）和甲醇產品，屬龍頭企業，今年再有新產能投產，實力毋庸置疑，一旦今年行業確認復甦，可望率先受惠。
化肥產業復甦可期
事實上，去年末季甲醇價格已有起色，主要係寒冬令內地唔少地區天然氣供應緊張，能源價格回升，為甲醇及尿素價格帶來支持。
去年國務院延長了尿素、磷酸一銨及二銨嘅淡季出口稅率適用時間，商務部又從去年六月起，開始對進口甲醇反傾銷立案調查，嚟緊惠農政策可能又有新猷，內地化肥產業復甦條件存在，化肥股確係值得重點關注嘅股類。
今年初，中海化學股價打破悶局，高位曾見5.84元，近月調整，股價大致守穩50日線，昨日升勢有成交配合，隨時又再開轉快車，目標再衝6元關，穿4.85元止蝕。