本文重點
五個經紀會（證券商協會、證券學會、證券及期貨業職工會、網上經紀協會、專業財經分析及評論家協會）昨日喺港交所（00388）舉行聯合春茗，咁啱大市又升咗400幾點，都算為春茗助興。
信心十足 一於長揸
昨日亦係「大笨象」滙控（00005）公布業績，雖然遜於預期，但身為超級fans嘅蔡太就力撐滙控。佢對滙控非常有信心，亦唔會介意派息多少。蔡太係滙控長期擁躉，收集了好多年，擺明長揸。
至於年屆八十歲嘅老牌富貴經紀、眾利股票公司主席董偉，佢嘹亮嘅京腔，劈頭一句「嫌佢（滙控）派得息少囉」。佢笑言唔擔心大笨象股價下跌，重申佢同公司都揸咗滙控幾十年，若升破「紅底」，會考慮「放少少」獲利，若然跌至八、九十蚊就「再買」做長線投資。