佢仲主動同太子講，話同狄勤思當年係「敵人」，但依家就係「朋友」；狄勤思亦回應話大家係朋友。何解詹培忠咁強調兩人依家係朋友？

德智被清盤互打官司

話說當年詹培忠與證監會不斷過招，鬥到飛起。喺九六年六月，當時係立法會議員兼德智發展主席及大股東嘅詹培忠入稟法院，控告當時嘅證監會主席梁定邦及高層查史美倫、狄勤思等對佢誹謗，要索償100億元！所持理由係佢話證監會當時喺向法院提交申請將德智清盤嘅入稟狀載有多項損害其聲譽嘅指稱，後來呢單官司當然撤銷咗。

詹培忠講番呢單官司記憶猶新，但所有嘅不快及憤怒就煙消雲散。咁又係嘅，所謂喺邊度跌低，就喺邊度企番起身，人生高低起跌兼變幻無常，對佢嚟講都係最佳寫照，佢仲有乜嘢睇唔開？

尋日五大經紀會春茗，詹培忠及查史美倫亦係嘉賓之一，相信兩人見面亦會「一笑泯恩仇」吧！