上星期港股反彈超過700點，亦令港股二月埋單計數倒升2.4%或者209點，收報20,608點，踏入三月份，大市係重返21,500點樓上，抑或要再試20,000點樓下，估計藍籌陸續公布的業績，加上管理層對一○年的展望，會係相當關鍵性。

今日收市後，大笨象滙控（00005）公布的○九年度成績表，肯定是鎂光燈的聚焦之處，經歷○八年金融海嘯，業績大倒退及33元震撼價供股，滙控捧場客似乎都對去年業績充滿期待，股價在上星期五升至85.85元，以一個月高位收市，可以反映一二。

滙控業績留意派息

今年證券商對滙控業績的預測，分歧大到得人驚，介乎36.2億到125.9億美元，以○八年賺57.28億美元計，意味着由37%倒退到增長1.19倍都有人估，以一間業務遍及全球的大型銀行來說，看法落差之大確實少見，毫無疑問，當中主要涉及對北美業務撥備預測的分歧，要短時間內分析滙控複雜的業績，並非小股民能力範圍，倒不如將注意力，放在派息政策身上，如果滙控能夠提高派送，可視為資本緊張情況紓緩，管理層對前景轉趨向樂觀的舉動。

近期內地航空股消息多多，春運搭客量比預期理想，航空業多飛多蝕嘅情況，隨着運載率好轉及油價持平而有所改善，南航（01055）及國航（00753）分別傳獲母公司注資，東航（00670）也不甘後人，外電報道話正就加盟星空聯盟、寰宇一家和天合聯盟進行談判。

內地航空市場好轉

有幾年股齡嘅，應該都知內地三大航空集團中，東航底子最差，持續虧損，○七年星航入股爛尾收場，去年第三季已出現「負資產」每股0.44元人民幣，但引入新策略股東一直只聞樓梯響，在急需輸血底下，管理層索性同證監申請A股批股集資。

過去幾年，東航蝕錢時間比賺錢多，肯定唔係穩陣長揸股，但每次航空業復甦周期，或人民幣升值預期殺到埋身，東航股價往往升勢最勁，令人又愛又恨。睇番去年六月航空股起步至今，東航升86%，就跑贏南航和國航的38%及78%升幅，歐元美元反彈乏力，人行因應部分產業過熱退市，未來兩三季相信人民幣升值預期會愈炒愈熱，配合載運情況有改善，展望東航與其他兩隻航空股股價，將步入蜜月期。