上周個別農業股有炒味，包括浩倫農業（01073）及玖源集團（00827）。由於預期今年農機補貼將再度增加，主營製造農業機械嘅第一拖拉機（00038），今年業績可更上一層樓，值得跟進。

放大圖片	放大圖片	放大圖片

汽車股隨時又翻炒

上周五汽車股亦見異動，吉利汽車（00175）母公司宣布收購浙江中譽，進軍內地專用車及改裝車市場，吉利股價一度高見3.92元，收報3.9元，升8.3%，成交高達6.09億元。查實，母公司收購資產，跟吉汽沒有直接關係，至於他日會否注入吉汽亦屬後話，股價炒高，相信係炒家缺乏炒作對象，眼見汽車業今年繼續獲中央政府重點支持，耐唔耐又可以藉消息炒一轉。

除咗吉汽之外，東風汽車（00489）及長城汽車（02333）升幅均達半成。長汽上月披露，今年一月旗下內地及海外汽車銷售達到2.51萬輛，同比增長1.5倍，惟按月則下跌13%。由於去年初汽車行業處於金融海嘯後嘅低潮，喺基數較低之下，今年一月份銷售量增幅較顯著乃意料中事，至於按月錄得跌幅，主要係去年十二月不少客戶趕及喺今年一月汽車購置稅免幅度下降前買車，故屬特殊因素影響而已。

早前長汽已就去年度業績發出盈喜，預計純利按年增幅喺五成以上。事實上，相比起去年上半年公司平均每月汽車銷售1.45萬輛計，今年一月份嘅銷售數字繼續保持強勢，若首季銷售數字繼續令人鼓舞，估值具上調空間。

初步估計，長汽去年淨利潤約8.5億元人民幣，料今年淨利潤可重越10億元人民幣大關，計落現價預測市盈率約十至十一倍水平。汽車股今年繼續獲國策庇蔭，長汽屬值博之選，下站目標見13.5元，止蝕位10.3元。