本文重點
美股上周中段升得好地地，冷不防上周四收市後，聯儲局突然出招，將貼現率調高四分之一厘，引發退市恐慌。恒指上周五大跌逾500點，收市報19,894點，大市成交回升至428億元。展望本周A股復市，也許難逃一跌，適逢嚟緊又係港股即月期指結算，大家要有心理準備，市況會較為波動，持盈保泰方為上策。
事實上，自去年十一月以來，港股嘅資金流向有所改變，由去年首三季持續流入，改變至過去三個月掉頭流出。其實股海潮漲潮退係正常現象，最重要係大家知道市場實況，適當嘅時候做適當嘅事，不要對着幹。喺指數找到重要支持前，宜嚴控入市注碼，短炒要記得咩叫「知足常樂」！
上周五新股瑞年國際（02010）掛牌，撞正大跌市，股價失守招股價，低位曾見2.75元，收市報2.77元，較招股價低7.6%。農曆新年前掛牌嘅國際煤機（01683）持續走低，上周五收報3.91元，跌3.2%，正所謂「莫買當頭跌」，尤其係股價已失守4元關，都係作壁上觀為宜。
去年喺金融海嘯陰影之下，圍繞衣、食、行三方面嘅業界，縱使毛利受到租金上升影響，但係都唔敢貿然加價，恐怕會打擊消費意欲。不過，踏入今年，唔少業界都密謀加價行動，就如近日便傳來多家大型連鎖快餐店喺新春後開始陸續加價。
食肆醞釀加價行動
阿莊喺本月上旬亦曾推介過大家樂（00341），近兩周走勢亦對辦，相信喺跌市中可發揮抗跌力。至於喺本港快餐業穩坐第二把交椅嘅大快活（00052），雖然交投較疏，但反正如今並非炒作搏殺之時，而論估值，大快活現價○八年度市盈率十二倍，息率4.75厘，○九年度預測市盈率約十倍，亦屬吸引，同樣係防守性之選。
睇好快餐業前景，呢兩隻「孖寶」可作中線持有，勝在揸得安心，話唔定仲可以博「財息兼收」。