熱門藍籌中移（00941）及滙控（00005）分別升1.3%及1.9%，希望開個好頭，讓股東財息兼收。年廿九收爐後，內地突然調高存款準備金率，幸好有長假讓市場消化，昨見內銀股照樣高收，中行（03988）升1.8%、工行（01398）升2.1%、交行（03328）升1.39%。不過，阿莊始終認為，內銀股集資陰霾未消，未係時候落注。

放大圖片	放大圖片	放大圖片

內地樓價不虞大跌

內地股市尚在休市，幾位好耐冇見嘅內地投資界好友來港聚首賀年。其中一位長駐內地、專搞房地產融資業務嘅友人話，去年內地一手樓銷售額達4萬億元人民幣，但按揭貸款佔不到2萬億元人民幣，可見內地樓市炒風過熱十分個別，而站喺確保銀行體系穩定嘅角度睇，中央對內房政策亦只會係有保有壓，唔會一面倒。所以呢位仁兄斬釘截鐵咁話，內地樓價冇大跌嘅空間，上半年係吸納優質內房股嘅時機云云。

另一位來自深圳嘅廠商朋友就話，歲晚各大主要城市消費市道暢旺，表現實在比想像中好，就如內地名牌運動服，一套賣七、八百蚊人仔，香港普通家庭可能嫌貴，但內地卻唔憂賣。咁講法，睇嚟無論今年股海如何波動，內需股會繼續屹立不倒，而喺運動服裝股之中，阿莊建議留意安踏（02020）。

銷售增長符預期

上月股市調整，安踏股價由12元水平回落至假期前低位9.79元才回穩，昨日升1.9%，收報10.3元。

大摩上月表示，安踏去年末季嘅同店銷售增長符合預期，並維持給予「增持」之建議。保守估計，今年安踏盈利增幅為20%，則現價預測市盈率廿倍樓下，派息比率維持喺50%以上，咁嘅估值風險有數得計，反彈目標12.5元，支持位9.2元。