港股牛年最後一個交易日，預咗牛皮悶局收場，成交薄弱下，恒指即市高位掂一掂20,428點便腳軟，證明20日平均線20,414點，對好友仲有一定阻嚇作用，大市最終下跌22點收爐，未能延續連彈三日的勢頭。現貨收市後期指才轉炒高水，反映低成交下，即時炒家做哪一邊風險都唔細，不如趁春節安心度假。

去年春節，我們剛受到金融海嘯衝擊，股市氣氛奇差，恒指之後跌近10,000點附近，結果這金牛教人有意外驚喜，顯露頗強生命力，全個牛年計恒指累積7,690點進帳，升幅61%。儘管沒法完全彌補鼠年10,891點跌幅，但V形反彈已令不少股民如搭上高速過山車一樣，魂不附體。虎年會點？要明白股市不可能年年有五、六成升幅，現時上市股份，已反映大部分盈利回升的期盼，筆者相信今年大家對股市回報要求，應適度的降低，虎年是買股唔買市的年頭，看官們要緊記矣。

手機代工利潤率低

常言道：「否極泰來。」睇番鼠年最差表現藍籌，跌82%的富士康國際（02038），牛年升幅優於大市，升幅達2.04倍。

從事代工、為環球各大品牌代為生產手機，富士康股價大上大落，說穿了，雖然生產需要高技術及科研成果的電子高新產品，可是卻無法突破，處身產業供應鏈下游，OEM及ODM的通病是利潤率相對低，像輝煌的○七年，做過百億美元生意，毛利只係9.8億美元左右，一遇風浪定單減少，生產成本包括廠房工人的薪酬、行政及科研等固定開支（○八年達6.3億美元），很難立即關廠炒人以縮皮，業績所受的壓力也很大，結果○八年純利就由7.2億美元大跌到1.2億美元，跌幅達八成三。

富士康明顯不適合買入後放入保險箱的股民，反而把握到行業周期的，想必會是如獲至珍。○九年上半年失地極多，盈警講明全年業績唔會睇好，大行預測一○年營業額91.1億美元，回復高峰期九成，但預測盈利只係2.78億美元，只係高峰期三分一多啲。到底大行是低估抑或代工生意元氣大傷？不得而知，唯一可肯定的是，手機代工生意最壞時刻過咗，暫時仍在復甦之路上，股價升幅或者難及牛年，但相信至少可以跑贏大市。