太子昨日收到恒地（00012）紀念品，精美皮盒內，係一支二○○六年釀製的法國紅酒，上面個標籤同招紙竟然係恒地自己嘅logo，唔通主席李兆基（四叔）去年身家大漲後，買咗間法國酒廠慶祝？
原來呢個係恒地公關部諗到嘅新一年VIP紀念品，由恒地向一家法國酒廠入貨，到港後改貼自己公司嘅logo奉客。
支酒仲有五大優點，首先大收宣傳功效；其二係價錢唔貴，避免送畀高官時面對收禮的價值尷尬；其三係可響應港府要發展紅酒港；其四係靚靚皮盒竟然係用環保回收物料製造；最後係可以收藏或暢飲。
據悉四叔首次見到呢件紀念品就非常歡喜，而且酒質唔錯，每次見完重要賓客都會送上一支，並下令在恒地重要活動時，作為達官貴人嘅小禮物，不少高官收到後都大讚有心思。