本文重點
恒指昨日試圖重上2萬點關未果，高位做19,976點，收市報19,922點，升131點，大市成交縮減至596億元。長假期氣氛轉濃，若外圍沒有重大不利消息出現，恒指重上2萬點關過年亦不出奇，惟阿莊相信，本月股市尚會有大幅波動，反彈到呢啲水平，不建議持重倉過長假。
市況反彈，唔少股份都借勢回勇。吉利汽車（00175）前日一度失守3元關，昨日有買盤趁低吸納，股價迅即收復失地，全日最高報3.54元，收市報3.53元，升14%。昨日阿莊提及嘅和記港陸（00715），真係仲有得炒，昨日再升13%，收報1.33元，若然手頭有貨，短炒應該要識得見好即收。
此外，阿莊昨日提及嘅中芯（00981），一如預期公布第四季度業績虧損擴大，並宣布委任新高層。更重要的是，公司證實正洽商引資安排，好消息可期，昨日股價回吐，曾低見0.62元。阿莊會放定買盤喺0.59至0.6元增持。
農機市場好環境
中央一號文件主題在於「三農」，今年農機補貼將繼續增加。事實上，近年內地嘅農機補貼金額持續增加，前年金額才40億元人民幣，但去年已增至130億元人民幣，這個龐大嘅市場已吸引外資注視。去年十一月，國際農業機械巨頭美國愛科集團便正式啟動喺江蘇興建新廠房，以圖在內地農機市場分一杯羹。
喺現成農業股之中，第一拖拉機（00038）正係主力做農機業務，去年上半年營業收入同比增長16%，至58億元人民幣，純利增長1.1倍至1.68億元人民幣，證明公司受惠農機補貼增加。展望今年經營大環境繼續保持向好，農機補貼有增無減，一拖嘅盈利前景有保證。
預計今年一拖嘅大型拖拉機年產能將翻一番至6萬台，中型拖拉機則由3萬台增至5萬台，增產來得正合時宜，股價可望更上一層樓，目標價6.8元，止蝕位4.8元。